Тен немесе «Тенбу» – бұл, қысқаша айтсақ, аспан әлемінде жүргеннің бәрін жалпылап атайтын, «құдай» дегенді білдіретін сөз. Буддизм шыққанға дейін адамдар табынып келген брахманизм, индуизм және де басқа діндегі құдайлар буддизмге өтіп, буддизмнің қорғаушы құдайларына айналған. Жібек жолы арқылы Қытайға, сосын Жапонияға Буддизм ілімі тараған кезде, әр жердің жергілікті өз құдайлары да қорғаушы құдайлар ретінде буддизмге енген. 

 

Бонтен – ежелгі үнді дінінде әлемді жаратушы ретінде табынған Брахма құдайы. Ал Тайшякутен – ежелгі үнді дінінде соғыс пен ерліктің құдайы ретінде табынған Индра құдайы. 
Храмдарда жиі көретін Шитифукуджин – Жапонияда бақыт әкелетін құдай саналатын жеті құдай. Бұл жетеуіне Эбису, Дайкокутен, Фукурокуджю, Бишямонтен, Хотей, Джюроджин және Бендзайтен жатады. Бұл құдайлардың әрқайсысы кезінде индуизм, буддизм, даосизм, синтоизм сияқты түрлі діндерге тиесілі болған құдайлар. Төменде осы жеті құдай туралы аз-маз ақпарат бере кетейік.

​

・Эбису – «сауданы өркендететін» және «мол өнім» әкелетін құдай. Оған балық аулағанда мол табыс, теңізде жүзгенде қауіпсіздік әкеледі деп сенеді. Бұл жапондардың өздерінен шыққан жалғыз құдай. Ол оң қолына қармақ ұстап, сол жақ қолтығына теңіз табан балығын қысып жымиып тұрған қалыпта бейнеленеді.

​

・Дайкокутен – индуизм құдайы. Дайкокутен – бұл Махакала, қирату мен жарату сияқты түрлі қасиетке ие индуизм құдайы Шиваның өзгерген кейпі. Махакала – Шива құдайының бүкіл әлемді күлге айналдыратын кездегі бейнесі. Алайда Жапонияға енген сәтінде оны халық жапонның ежелгі құдайы Окунинушимен бір құдай ретінде қабылдап кеткен. Оған байлық әкеледі, кәсіпті гүлдендіреді деп сенеді. Ол қолына сілкісе болды, қалаған затыңды шығарып беретін сиқырлы балға ұстап, үлкен бақыт дорбасын асынып алған болып бейнеленеді.

​

・Фукурокуджю – қытайдың даосизм дінінен енген құдай. Оған даосизмде «үш бақыт» саналатын «бала сүю», «ақшалы болу» және «ұзақ өмір сүру» бақытын әкеледі деп сенеді. Ол басы сопақша келген ақ сақалды дәруіш ретінде бейнеленеді.

​

・Бишямонтен байлық пен қазынаның иесі болып есептелетін индуизм құдайы Кубераның негізінде шыққан. Бұл құдай Буддизмге енгеннен кейін адамдар оған соғыс құдайы ретінде табына бастады. Сонымен қатар, ол жын-сайтандарды қуады деген де сенім бар. Оны әскери қолбасшы сияқты қалыпта бейнелейді.
 

・Хотей Қытайда шынында да өмір сүрген делінетін дзен монахының негізінде шыққан. Ол өзінің табынушылары берген тұрмысқа қажет заттар салынған үлкен дорбасын тастамай арқалап жүріп, мұқтаж адамдарға таратқан дейтін әңгіме бар. Оны бақ пен байлық әкелетін құдай деп санайды. Дөңгеленген үлкен қарны бар, сырғалығы салбыраған кейіпте бейнелейді.
 

・Джюроджин – Қытайдың даосизм дінінен шыққан ұзақ ғұмыр сыйлайтын құдай. Ол мәңгі өлмейтін дәруіш ретінде, басына күләпара киген, ұзын ақ сақалды кейіпте бейнеленеді. Оны Фукурокуджюмен шатастырып алу оңай. Сондықтан ол қарт па және күләпара киген бе, жоқ па дегенге мән берген дұрыс. Яғни, егер күләпара киген болса, ол Джюроджин, ал егер сопақша басы жалаңаш болса, ол Фукурокуджю болғаны.

​

・Бендзайтен дегеніміз – әу баста индуизмдегі әйел құдай Сарасвати. Үнділер оған өзен құдайы ретінде табынған. Буддизмге енгеннен кейін ол музыкалық қабілет, талант, байлық пен даналық сыйлайтын аспан аруына айналып шыға келді. Ол су құдайының да қасиеттерін сақтап қалғандықтан, суды көп қажет ететін күріш егу шаруашылығы дамыған Жапонияда жұрттың ықыласына бөленген, Жапонияның аралдары мен теңіз жағалауы аймағында ерекше дәрежеленеді. Бақыт әкелетін жеті құдайдың ішіндегі жалғыз әйел құдай екенін есте ұстасаңыз жеткілікті.