1960 жылдарға қарай 547 кино түсірген жапон киноөндірісі өзінің ең биік шыңына жетті. Бұл тарихтағы ең жоғарғы көрсеткіш еді. Бір қарағанда киноөндіріс енді толасссыз дами беретіндей көрінген. Алайда 1950 жылдардың аяғынан бастап жапон киноөндірісі тоқырауға ұшырап, көрермендердің саны күрт азая бастады. 1958 жылы көрермендер саны 1,2 миллиардқа жетсе, 1963 жылы бұл көрсеткіш екі есе азайып, 500 миллионнан сәл ғана асатын көрермен қалды.  

Мұндай құбылыстың негізгі себебі 1953 жылдан бастап пайда болған теледидардың жылдам таралуы еді. 1959 жылы императордың тақ мұрагерінің үйлену тойынан кейін теледидар дүйім жұрттың арасында кеңінен тарала бастап, 1964 жылғы Токио олимпиадасынан кейін оның таралуы тіпті жылдам қарқын алды. Нәтижесінде адамдар кинотеатрға баруды азайтып, теледидарға өте бастады.

​

Соғыс, дискриминация, кедейлік сияқты әлеуметтік тақырыптарды көтеріп, солардың ықпалындағы әлсіздердің бейнесін жанашырлықпен әдемі суреттейтін туындыларды жариялап келген Тадаши Имаидың «Анау порттың жарығы» фильмі, қарттар мәселесін көтерген «Комедия: Жапонның әжелері» фильмі, феодалдық қоғамның қатігездігін жеті оқиғамен сипаттап, 13-ші Берлин халықаралық кинофестивалінде «Алтын аю» жүлдесін жеңіп алған «Бушидоның қатігездігі» фильмі, отбасы және адамдар арасындағы қарым-қатынас жайлы сөз еткен туындыларды көптеп дүниеге әкеліп, жапон кинематографы тарихында үлкен із қалдырған Ясуджиро Одзудың дүние салғаннан кейін жарық көрген туындысы, қартайған әке мен тұрмыс құратын жасқа жеткен қызының көңіл иірімдерін нәзік бейнелейтін «Шортанның дәмі» фильмі, үкімет жек көретін адамдардың қорланған күйін суреттеп, өзі де үкіметке қарсы позиция ұстанған Нагиса Ошиманың қауіпсіздік үшін күресті бейнелейтін «Жапон түні мен тұман» фильмі, өлім жазасы тақырыбын көтерген «Дарға асу» фильмі, сол кездің дәстүрлі форматынан бас тартып, қылыштың шапқан даусын нақ беру, қатігез көріністерді ашық көрсету сияқты, тарихи драмалардың нағыз тартымды тұстарын толық беріп, кейінгі туындыларға үлкен ықпал тигізген Акира Куросаваның «Оққағар», «Цубаки Санджюро» фильмдері, Кобо Абенің романы негізінде түсірілген, авангардтық және сюрреалистік адам драмасының шедеврі саналатын Хироши Тешигахараның «Құм құрсауындағы әйел» фильмі, Цутому Минакамидің (Мидзуками) аттас романы бойынша түсірілген адам жүрегінде бұғып жатқан түнекті әсерлі суреттейтін Тому Учиданың «Аштық бұғазы» фильмдерін мысалға келтіре аламыз.